भक्तपुर साकोस रापिड नेसनल चेस च्याम्पियनशीपमा रुपेश जैसवालको अग्रता

कार्तिक १७, भक्तपुर । भक्तपुर साकोसको २७ औँ स्थापना दिवसको अवसरमा आयोजित भक्तपुर साकोस रापिड नेसनल चेस च्याम्पियनशीपको उद्घाटन नेपाल बुद्धिचाल महासंघका कोषाध्यक्ष ताराबहादुर रानाभाट र भक्तपुर साकोसका अध्यक्ष निर्मल प्रजापतिले चेसको गोटी चाली गर्नुभयो । 

आज सम्पन्न चार चरणको खेलबाट वर्तमान नेपाल च्याम्पियन रुपेश जैसवाल, पुरुषोत्तम सिलवाल, पूर्व नेपाल च्याम्पियन बद्रीलाल नेपाली, ललितपुरका सरोज महर्जन र भक्तपुरका विक्रम चोकामी ४ अंकसहित अग्रता कायम गरेका छन् । त्यस्तै दोलखाका आशिष फुँयाल, भक्तपुरका राजेश कक्षपति, पूर्व नेपाल च्याम्पियन नवीन तण्डुकार, युवा खेलाडीहरू सुदिप तामाङ, धिरेन राई, सुरज सिंह ३.५ अंकसहित दोस्रो स्थानमा रहेका छन् । 

पाँचौ चरणदेखि नवौँ चरणसम्मका खेलहरू भोली बिहान १० बजेबाट शुरू हुनेछ । अपरान्ह ३ बजे भक्तपुर नगरपालिकाका मेयर सुनिल प्रजापतिको प्रमुख आतिथ्यमा पुरस्कार वितरण कार्यक्रम हुनेछ । साथै कार्तिक १९ गते बिहान ८ बजे भक्तपुर साकोसको २७ औँ स्थापना दिवसको अवसरमा सहकारीका ज्येष्ठ सदस्यहरूलाई पोषण वितरण कार्यक्रम संस्थाको प्राङ्गणमा हुनेछ ।