​कतार विश्वकप गुमाउने शीर्ष ५ राष्ट्र

​कतार विश्वकप गुमाउने शीर्ष ५ राष्ट्र

शुक्रबार, असोज १४, २०७९

एजेन्सी – आगामी नोभेम्वर र डिसेम्वरमा कतारमा हुने फिफा विश्वकप कतार २०२२ को मिति नजिकिंदै छ । टोलीहरुले अन्तिम तयारी थालिसकेका छन् । तर, केही राष्ट्रले कतारमा गएर विश्वकप खेल्नुको सट्टा हेरेर चित्त बुझाउनुपर्ने बाध्यता बनेको छ ।

विश्वकप अहिलेसम्मकै सबैभन्दा प्रतिष्ठित प्रतियोगिता हो । विश्वकप खेल्ने र जित्ने हरेक देशको सपना हुन्छ । यो एक फुटबलरले राष्ट्रको लागि दिन सक्ने सबैभन्दा ठुलो सम्मान हो । तर, केही चर्चित र स्टार खेलाडीले भरिएको केही राष्ट्र यसपटक विश्वकपमा छनोट हुन सकेका छैनन् ।

विश्वकपमा ३२ टोलीले मात्रै छनोट हुने गर्दछ । छनोटमा राम्रो गर्न नसकेपछि कतारमा दुई महिनापछि हुने फिफा विश्वकपमा केही राष्ट्र र तिनका खेलाडीले घरमै बसेर हेर्नुपर्ने बाध्यता छ ।

५ नाइजेरिया

नाइजेरिया अफ्रिकी फुटबल महासंघको सबैभन्दा बलियो टोली हो । अफ्रिकी राष्ट्र २००६ पछि पहिलो पटक मुख्य ड्रमा पुग्न असफल भएपछि २०२२ फिफा विश्वकपबाट अनुपस्थित हुनेछ । सुपर इगल्स भनेर चिनिने नाइजेरिया घानासँग प्लेअफमा पराजित भएको थियो ।

पहिलो लेग गोलरहित बराबरीमा सकिँदा दोस्रो लेग १–१ गोलको बराबरी हुँदा घाना अवे गोलमा विश्वकपमा छनोट हुन सफल भयो । नाइजेरिया फिफा वरीयतामा ३०औं स्थानमा छ र अफ्रिकाको तेस्रो उच्च स्थानमा रहेको देश हो । भिक्टर ओसिमहेन, अडेमोला लुकम्यान र केलेची इहेनाचो जस्ता खेलाडीहरू कतारमा हुने विश्वकपमा अनुपस्थित हुनेछन् ।

४. चिली

फिफा विश्वकप २०२२ खेल्नबाट वञ्चित हुने चिली अर्काे प्रमुख राष्ट्र हो । चिलीले लगातार दोस्रोपटक विश्वकप गुमाएको हो । उनीहरूको छनोट अभियान निकै निराशाजनक थियो । आफ्नो १८ खेलमध्ये पाँच खेल मात्र जितेर कोपा अमेरिका २०१६ को विजेता दक्षिण अमेरिकी छनोटमा शीर्ष पाँच बाहिर रह्यो । चिली छनोटमा सातौं स्थानमा रह्यो । एलेक्सिस सान्चेज, एलेक्स भिडाल र बेन ब्रेरेटन जस्ता खेलाडीहरूले घरमै बसेर विश्वकप हेर्नेछन् ।

३. कोलम्बिया

दक्षिण अमेरिकी राष्ट्र कोलम्बिया पनि विश्वकपमा छनोट हुन असफल भएको छ । कोलम्विया कन्वेवल क्वालिफायरमा छैटौं स्थानमा रह्यो । कोलम्विया छनोटमा पेरुसँग १ अंकले पछि रह्यो । २००१ कोपा अमेरिका विजेता कोलम्वियाले २३ तथा पेरुले २४ अंक जोड्यो ।

फिफा वरियतामा कोलम्बिया १७औं स्थानमा छ र दक्षिण अमेरिकाको चौथो उत्कृष्ट राष्ट्र हो । कोलम्विया २०१४ मा क्वार्टरफाइनल र २०१८ मा प्रि–क्वाटरफाइनलमा पुगेपनि यसपटक छनोट नै हुन सकेन । लुइस डियाज, जेम्स रोड्रिग्वेज र जुआन कुआड्राडो जस्ता खेलाडीहरू विश्वकपमा बाहिर रहनेछन् ।

२. स्वीडेन

स्वीडेन प्रमुख युरोपेली राष्ट्रहरू मध्ये एक हो जुन यस वर्षको अन्त्यमा भव्य प्रतियोगिताको हिस्सा हुनेछैन । युरोपेली छनोट समूहमा दोस्रो स्थानमा रहेर प्लेअफमा स्थान बनायो । स्वीडेनले अन्तिम खेलमा चेक गणतन्त्रलाई हराए, तर पोल्याण्डसँग २–० ले पराजित भएपछि फिफा विश्वकप २०२२ मा छनोट हुन असफल भयो ।

स्वीडेन विश्व वरीयतामा १९औं स्थान र युरोपको दोस्रो उच्च स्थानमा रहेको टोलीबाट ज्लाटन इब्राहिमोभिच, एलेक्सान्डर इसाक, भिक्टर लिन्डेलोफ, एमिल फोर्सबर्ग र डेजान कुलुसेभ्स्की विश्वकपमा नदेखिने प्रमुख नाम हुन्।

१. इटाली

सन् २०२२ को फिफा विश्वकपमा इटाली नखेल्ने सबैभन्दा ठूलो टोली हो । विश्वकपको चार पटकको विजेता र वर्तमान युरोपियन च्याम्पियन इटाली लगातार दोस्रोपटक विश्वकपमा छनाट हुन सकेनन् । युरोपेली छनोटमा दोस्रो स्थानमा रहँदै प्लेअफमा पुग्न सफल भयो । प्लेअफ सेमिफाइनलमा, इटाली उत्तरी म्यासेडोनियासँग भिड्यो तर इटालीले उत्तरी म्यासेडोनियासँगको खेलबाट नतिजा आफ्नो पक्षमा पार्न सकेन ।

२०१८ मा पनि छनोट हुन असफल इटालीको लागि यो ठूलो धक्का थियो । इटाली र पोर्चुगलबीचको सम्भावित प्लेअफ फाइनल टाई नतिजाको रूपमा हुन सकेन । कतारमा हुने विश्वकपमा सिरो इमोबिल, मार्को भेराट्टी, जोर्गिन्हो र अन्य धेरै विश्वस्तरीय इटालियन खेलाडीहरू अनुपस्थित छन् ।

यि राष्ट्र बाहेक नर्वे, इजिप्ट, पेरु र युक्रेनलगायतका राष्ट्र पनि विश्वकपमा छनोट हुन असफल भएका छन् ।