पेनाल्टीबाट सुरूवात भयो शुभारम्भ युवा समाजको विजयी यात्रा

गल्छी खबर, असोज ०६। युवा शक्ति सामुदायिक विकास समाज परिवारले आयोजना गरेको 7/A SIDE नकआउट फुटबल प्रतियोगितामा शुभारम्भ युवा समाज गल्छीले पेनाल्टीबाट विजय यात्रा शुरु गरेको छ।

शुभारम्भ युवा समाज, गल्छी र बेल्खु युनाइटेड,गल्छी बीच भएको प्रतियोगितामा २-२ को बराबरी पछि खेल पेनाल्टीमा ग‌एको थियो। पहिलो चरणको पेनाल्टीमा बराबर भ‌एपछि रक्षकहरुलाई पेनाल्टी सुट हान्ने मौका मिल्यो त्यसमा पनि बराबर भ‌एपछि भने ९-८ को अन्तरले पेनाल्टी मार्फत शुभारम्भ युवा समाजलाई विजय हात पर्यो।

खेलको पहिलो हाफमा नै १ गोल हानेर अग्रता राखेको बेल्खु युनाइटेडले दोस्रो हाफ सकिन ३ मिनेट अघि अर्को गोल गर्दै अन्तिम समयको पर्खाइमा रहेको खेलमा शुभारम्भ युवा समाजले रोचक ढंगले अन्तिम २ मिनेटमा २ गोल गर्दै खेल बराबरीमा रोकिएको थियो।

मलाङ लामा र विज्ञान थापाले बेल्खु युनाइटेडको तर्फबाट गोल गरेर दिलाएको अग्रतालाई अन्तिम समयमा बराबरी बनाउने शुभारम्भ युवा समाजका विवेक तामाङ र प्रकाश मर्दी हुन्।

युवा शक्ति सामुदायिक विकास समाज परिवारका अध्यक्ष राजन न्यौपानेका अनुसार १८ टिम सहभागी रहेको यस प्रतियोगितामा प्रथम हुनेलाई नगद रु ५५,५५५/- , मेडल र प्रमाण पत्र त्यसैगरी द्वितीय हुनेलाई रु २५,५५५/-, मेडल र प्रमाण पत्र रहेको छ भने सर्वाधिक गोलकर्ता र सर्वाधिक गोलरक्षकलाई पनि नगद रु २,५००/-, मेडल र प्रमाणपत्र प्रदान गरिने बताएका छन्।