मैले टिकट किन नपाउने? - रुद्र ढुङ्गेल

 ✍️रुद्र ढुङ्गेल 

म एनजीओ चलाउँछु,

सबैलाई गलाउँछु ।

मैले डोजर किनेको छु,

सबैलाई चिनेको छु ।

सबै ठेक्कामा नै हाल्छु,

सबैलाई मै त पाल्छु ।

पैले पनि उठेको हुँ,

जनमत लुटेको हुँ ।

हारको होस् या जितको,

म सँग त अनुभव छ,

तिमी फुस्रे सँग के छ ?

म सबै दलाल चिन्छु,

सबलाई औँलामा गन्छु ।

आफ्ना हनुमान पाल्नका लागि,

अर्कै कदम चाल्नका लागि,

कुनै आइतबार कुर्नै पर्दैन,

कुनै साइत जुर्नै पर्दैन ।

क्षणभरमैं पार्टी छोड्न सक्छु,

अन्तै घाँटी जोड्न सक्छु ।

त्यसैले बुझे हुन्छ,

पार्टी भनेकै म हुँ,

म पार्टीको हु‘वा न हु‘ ।

त्यसैले जान्न कसैको मलामी,

जान्या छु पर्नेको गर्न गुलामी ।

कामै हो तिम्रो घर–घर धाउने, 

मैले नपाए टिकट कसले पाउने ?

सक्छौ मलाइ समर्थन  गर,

नभए अरुको कुरै नगर ।

मन भए पार्टी के ?

पार्टी नभए मलाइ के ?

कसको ऑंट छ औँला उठाउने,

अनि, मैले नपाए टिकट कसले पाउने ?

मलाइ कमिसनको दर थाहा छ,

सबैको नाम, थर थाहा छ ,

मलाइ विरोधीको घर घर थाहा छ ।

मलाइ काँधमा बोक्नेको लागि,

विरोधीको टाउको ठोक्नको लागि,

हनुमानको डफ्फा कसरी पाल्ने ?

नोटका बिटा कहॉबाट हाल्ने ?

तिमीलाई थाहा नै छैन,

मेरो कस्तो दाउ छ ।

बजारमा कस्तो भाउ छ ।

गमेर कुरा सुन्यौ भने,

मनमनै कुरा गुन्यौ भने,

बुझ्छौ योजना सर्वत्र छाउने,

अनि,

मैले टिकट किन नपाउने ?

:-लेखक रुद्र ढुङ्गेल गल्छी खबरका कानुनी सल्लाहकार समेत हुन्।