"छोराछोरीको फोन :- लक्ष्मीप्रसाद ढकाल !!"

छोराछोरीको फोन ( गद्यकविता )

छोराछोरीको फोन कहिले आउँथ्यो कहिले आउँदैनथ्यो 

तर तल्लाघरे मेरा छिमेकी सबैले सुन्ने गरी कराएर सुनाउँथे 

अस्ट्रेलियाको सिड्नीमा कोरोना कस्तो छ छोरी 

अमेरिकाको न्युयोर्कमा कोरोना कस्तो छ छोरा 

छोरीले पठाएको पचास डलर पाएँ

छोराले आई .एम . ई बाट पठाएको सय डलर पाएँ

यहाँ त कोरोनाको तेस्रो लहर चलिराछ 

पाँच  दिन सिटामोल र तातो पानी खाएपछि खतम  ।

लाग्छ , हालखबर होइन, सिड्नी र न्युयोर्कको विज्ञापन भैराछ 

छोराछोरीको फोन आए पनि नआए पनि

ती मेरा तल्लाघरे छिमेकी 

सधैं यसरी नै कराइरहेका हुन्छन् , चिच्याइरहेका हुन्छन् 

समाजमा एक किसिमको आतङ्क फैलाइरहेजस्तो 

मानौँ , उनका मात्र छोराछोरी अस्ट्रेलिया र अमेरिका गएका हुन्  

हाम्रा छोराछोरी विदेश जान नसकेर रल्लिएर बसेजस्तो

मानौँ ,अस्ट्रेलिया र अमेरिका भनेको स्वर्ग हो ।

उता छोरी दाइसित फोनमा भन्थिन्

दाइ , बेकारमा अस्ट्रेलिया आएछु , सात वर्षदेखि भाँडा मोलेर बाँचिरहेछु 

बहिनी , म पनि बेकारमा अमेरिका आएछु 

म पनि नौ वर्षदेखि गाडी धोएर बसिरहेछु 

उता नेपालमा कत्रो सान र मान छ हाम्रो 

फलानाका छोराछोरी अस्ट्रेलिया र अमेरिकामा छन् 

लोकसेवा पढेर शाखा अधिकृत भएको भए

आफ्नै देशमा कत्रो इज्जत हुन्थ्यो 

त्रि . वि .शिक्षक सेवा आयोग पास गरेर कलेजको प्रोफेसर भएको भए कत्रो मान र सान हुन्थ्यो ।

धेरै दिनदेखि आवाज सुनेको छैन मैले आजकल 

अचानक छिमेकीकी  छोरीले अस्ट्रेलियाबाट मलाई फोन गरिन्

अचानक छिमेकीको छोराले अमेरिकाबाट फोन गरे मलाई 

अङ्कल , बाबाको फोन उठेन , के भयो बाबालाई हेरिदिस्यो न 

म पनि हतारहतार गरेर छिमेकीको घर गएँ , घरबाट दुर्गन्ध आइरहेको थियो 

मैले होहल्ला गरेँ , सबै छिमेकी भेला भए , 

पुलिस आयो , पुलिसले पोस्टमार्टम गर्यो 

मेरा छिमेकी कोरोनाको तेस्रो लहरले मरेछन् , अविदितको यात्रामा गएछन् 

हिजोआज गाउँ नै शून्य ! छोराछोरीको फोन पनि शून्य ।

               ***समाप्त *** 

रचना : लक्ष्मीप्रसाद ढकाल 

तोपगाछी , क्याम्पाबजार, झापा 

हाल : दधिकोट , भक्तपुर ।