टिपरले ठक्कर दिँदा मोटरसाइकल चालकको मृत्यु

१६ फागुन, गल्छी खबर । मोरङको ग्रामथान गाउँपालिका–४ मा टिपरले ठक्कर दिँदा सोमबार दिउँसो मोटरसाइकलमा सवार एकजना युवाको मृत्यु भएको छ । मोतिपुर–तेतरिया सडक खण्डमा पूर्वबाट पश्चिमतर्फ आउँदै गरेको प्रदेश १–०२–००१ ख ९१२० नम्बरको टिपरले को २९ प ९५६० नम्बरको मोटसाइकललाई ठक्कर दिँदा सोमबार दिउँसो २ :३० बजेतिर दुर्घटना भएको हो । 

दुर्घटनामा  मोटरसाइकलको पछाडि बसेका ग्रामथान–४ का २५ वर्षीय सुदीप विश्वासको मृत्यु भएको मोरङ ट्राफिक प्रमुख प्रहरी निरीक्षक चन्द्रबहादुर खड्काले जानकारी दिएका छन्। उनका अनुसार दुर्घटनामा परेर गम्भीर घाइते भएका विश्वासको उपचारका क्रममा विराटनगरको कोसी अस्पतालमा दिउँसो ३:३० बजेतिर मृत्यु भएको छ। 

दुर्घटनामा मोटरसाइकल चालक ग्रामथान–४ का २५ वर्षीय विवेककुमार माझी थारु सामान्य घाइते भएको खड्काले बताएका छन् । उनका अनुसार मोटरसाइकलले टिपरलाई ओभरटेक गर्ने क्रममा दुर्घटना भएको हो । दुर्घटनालगत्तै प्रहरीले टिपर चालक कटहरी गाउँपालिका–२ का ५३ वर्षीय आनन्दकुमार श्रेष्ठलाई नियन्त्रणमा लिएर घटनाको अनुसन्धान थालेको छ ।