"बेहुली लिएर फर्किंदै गरेको जिप दुर्घटना :- आठको मृत्यु पाँच घाइते !! "

 

    गल्छी खबर।  प्युठानमा बेहुली लिएर फर्किंदै गरेको जिप दुर्घटना हुँदा आठजनाको मृत्यु भएको छ। दुर्घटनामा अन्य पाँचजना घाइते भएका छन्।

दुर्घटनामा बेहुला बेहुलीसहित पाँचजना गम्भीर घाइते भएका छन्। उनीहरुको जिल्ला अस्पताल बिजुवारमा उपचार भइरहेको छ।

प्युठानको नौबहिनी गाउँपालिकाको लुङबाट बेहुली लिएर गौमुखी गाउँपालिकाको लिवाङ फर्किंदै गरेको ग १ ज ५०९२ नम्बरको जिप गएराति ३ बजे गौमुखी- ६ ओखरपाटामा दुर्घटनामा परेको हो।

 बेहुला २५ वर्षीय दानबहादुर खड्का र बेहुली २० वर्षीया रीमा बिसीको अवस्था चिन्ताजनक छ। उनीहरुको जिल्ला अस्पतालमा उपचार भइरहेको छ। जिल्ला प्रहरी कार्यालय प्युठानका सूचना अधिकारी प्रहरी निरीक्षक बेनीप्रसाद गैरेले बताएका छन् ।
दुर्घटनामा ज्यान गुमाउने ४० वर्षीया बसन्ती खड्का, ११ वर्षीया बालिका यलिसा खड्का, ३० वर्षीया केशरी खड्का, करिब ५० वर्षीय बलबहादुर बुढामगर, ३२ वर्षीय खिमबहादुर खत्री, ३९ वर्षीय बसन्त खड्का र ५० वर्षीय नन्दि खड्काको सनाखत भएको छ।

दुर्घटनामा ज्यान गुमाउने करिब २२ वर्षीया युवतीको अझै सनाखत हुन नसकेको गैरेले जानकारी  दिए। दुर्घटनामा ६ जनाको घटनास्थलमै र दुई जनाको अस्पताल लैजाँदा बाटोमै मृत्यु भएको हो।