शिवशक्ति युवा समाजले सम्पन्न गर्यो खेलकुद तथा सांस्कृतिक कार्यक्रम

 गल्छी खबर, कात्तिक २०। श्री शिवशक्ति युवा समाजको खेलकुद तथा सांस्कृतिक कार्यक्रम उपसमितिद्वारा शुभ दीपावली, नेपाल सम्वत् ११४२ र छठ पर्वको उपलक्ष्यमा आयोजित वडास्तरिय भलिबल प्रतियोगिता र सांस्कृतिक कार्यक्रम भब्य र सभ्य रुपमा सम्पन्न भएको छ ।

समाजका अध्यक्ष दीपेन्द्र कुमार श्रेष्ठको सभापतित्वमा सम्पन्न कार्यक्रमको संचालन सचिव सुमन श्रेष्ठले गर्नु भएको थियो । सल्लाहकार समितिका सदस्य राजु गिरीद्वारा स्वागत र शुभकामना मन्तव्यबाट शुरु भएको कार्यक्रममा बिभिन्न अतिथिहरुले आ-आफ्नो शुभकामना र मन्तव्य व्यक्त गर्नुभएको थियो । 

यस कार्यक्रममा आजीवन सदस्यहरुलाई सम्मान र आजीवन सदस्यता प्रदान गरिएको थियो ।  आजीवन सदस्यता लिई यस युवा समाजलाई भबिष्यमा समेत निरन्तर सहयोग गर्ने प्रतिबद्धता ब्यक्त गर्ने सदस्यहरु गोबिन्द गिरी, अशोक श्रेष्ठ, किरण श्रेष्ठ, नारायण श्रेष्ठ र कमल श्रेष्ठ रहनु भएको छ। 

वडा भित्र रहेका प्रतिभाशाली खेलाडी छनौट गरी भबिष्यमा वडाकै प्रतिनिधित्व गरी खेल्न सक्ने भलिबल खेलाडी छनौट गर्ने उद्देश्यले आयोजना गरिएको खेलमा ५ टिम सहभागी थिए भलिबल प्रतियोगिताको उद्घाटन १८ गते वडा नंम्वर १ का का. मु. वडाध्यक्ष श्री मदन खतिवडाले गर्नु भएको थियो । प्रतियोगितामा बतासे भलिबल टिम प्रथम, दलाङ भलिबल टिम द्वितीय र थुम्की भलिबल टिम तृतीय भएको थियो भने दलाङ भलिबल टिमका राजेश बिसुन्के उत्कृष्ट खेलाडी घोषित हुनुभएको थियो । प्रथम, द्वितीय र तृतीय हुने टिमलाई क्रमश ५०००, ३००० र २००० नगद पुरस्कार र प्रमाण-पत्र प्रदान गरिएको थियो भने उत्कृष्ट खेलाडीलाई ५०० नगद पुरस्कर प्रदान गरिएको थियो । त्यसै गरि सांस्कृतिक कार्यक्रम अन्तर्गत नृत्यहरु,  चुट्किला,  हांस्यकला,  घ्याम्पो फुटाई तथा बालबालिकाहरुको लागि चम्चा दौड  समेत राखिएको थियो । अति नै रोमाञ्चक भएको घ्याम्पो फुटाई कार्यक्रममा बृद्ध देखि बालक समेत गरी ३२ जना सहभागी मध्ये अरुस श्रेष्ठ एकजनाले मात्र लक्ष्यमा प्रहार गर्न सफल हुनुभएको थियो ।  

स्थानीय कलाकार भाई बहिनीहरुको साथै All style of dance center गल्छीका कलाकारहरुद्वारा कार्यक्रममा बिभिन्न नृत्यकलाहरु प्रस्तुत भएको थियो । स्थानीय कलाकार समूहको नेतृत्व कुसुम श्रेष्ठले गर्नुभएको थियो । 

स्थापना भएको छोटो समयमै सबैको आशा, भरोसा र विश्वास जित्न सफल यस समाजले भविष्यमा पनि सबैको साथसहयोगमा सामाजिक कार्यहरुमा आफ्नो भूमिका निर्वाह गर्ने प्रतिबद्धता व्यक्त गरेको छ । कार्यक्रम र भलिबल खेल सभ्य रुपमा संचालन गर्न सहयोग गर्ने स्वयंसेवकहरुलाई समेत कदरपत्र प्रदान गरिएको थियो । 

खेल र कार्यक्रमको लागि आवश्यक बल, जाली, जर्सी र क्याप टोपी दिई महत्वपूर्ण योगदान दिनुहुने समाजसेवीहरु भाईकाजी तिवारी र किरण नेपाल प्रति बिशेष आभार प्रकट गर्दै समापन भएको कार्यक्रममा समाजका अध्यक्ष तथा कार्यक्रमका  सभापति दीपेन्द्र श्रेष्ठले भविष्यमा अझै धेरै साथ र सहयोगको अपेक्षा गरिएको कुरा व्यक्त गर्नु भएको थियो ।