गल्छी खबर, असोज १५। नेकपा एमालेको प्रथम विधान महाधिवेशन शुक्रबारदेखि सुरू भएको छ। गोदावरीस्थित सनराइज हलमा अध्यक्ष केपी शर्मा ओलीले महाधिवेशनको उद्घाटन गरेका छन्।
पार्टीको आगामी नीति तय गर्ने विधान महाधिवेशनमा अध्यक्ष ओली निकै हावी देखिएका छन्। उनले प्रस्तुत गरेको राजनीतिक प्रस्तावमा मात्रै होइन सभास्थल बाहिर, भित्र र बाटोमा समेत जताततै ओलीमात्रै देखिन्छन्।
सनराइज हलको चौरमा कम्युनिष्ट सिद्धान्तका प्रतिपादक कार्ल मार्क्स र एमाले नेता मदन भण्डारीका डमी कुनामा राखिएको छ भने बीचमा ओलीको बडेमानको डमी राखिएको छ।
महाधिवेशनमा सहभागी हुन आएकाहरूले ओलीको त्यही डमीसँग उभिएर फोटो भिडिओ खिचिरहेका छन्।
सभा हलभित्र बाँडिएको पानीको बोतलमा पनि ओलीकै तस्बिर प्रयोग गरिएको छ।
त्यतिमात्र होइन सातदोबाटोदेखि गोदावरीसम्म सडकछेउमा रहेका बिजुलीका पोल-पोलमा पनि ओलीका तस्बिर टाँगिएको छ।
महाधिवेशनस्थलका होर्डिङ बोर्ड, ‘स्ट्याचु’ तथा सवारीसाधनका फ्लेक्सदेखि पानीको बोतलसम्ममा भने एमाले अध्यक्ष केपी शर्मा ओलीको फोटो छाएको देखिन्छ ।
0 Comments