स्नातक तह तेस्रो वर्षका सबै परीक्षा स्थगित

काठमाडौ, वैशाख ३० - त्रिभुवन विश्वविद्यालयले बैशाख २९ गते गएको शक्तिशाली भूकम्पपछि स्नातक तह तेस्रो वर्षको परीक्षा स्थगित गरेको छ । परीक्षा नियन्त्रण कार्यालय बल्खुका परीक्षा नियन्त्रक केशव बास्तोलाका अनुसार जेठ १४ गतेदेखि सुरु हुने परीक्षा अर्को सूचना जारी नभएसम्मको लागि स्थगित गरिएको छ । उनका अनुसार स्नातक तहको सबै संकायका परीक्षा स्थगित गरिएको छ ।

बास्तोलाले अर्को सूचना परीक्षा हुनेदिन भन्दा १५ दिन पहिला सार्वजनिक गरिने बताए । उनले भने, 'भूकम्पपछि परीक्षाको वातावरण नै विग्रियो । त्यसैले हामीले जेठ १४ गतेदेखि सुरु हुने जाँच सबै स्थगित गरेका छौं ।'

यसैगरी उच्च माध्यमिक शिक्षा परिषद्ले पनि यसअघि नै कक्षा ११ र १२ को परीक्षा स्थगित गरिसकेको थियो। परिषद्ले अहिलेसम्म ११ र १२ को परीक्षा कहिले हुने भन्ने सूचना सार्वजनिक गरेको छैन ।