अनेरास्ववियुले धादिङमा विद्यालय बनायो

वैशाख १२ गते आएको बिनासकारी महाभूकम्पका कारण धादिङका अधिकांश विद्यालयहरू क्षतिग्रस्त बनेका छन् । तिनै क्षतिग्रस्त विद्यालयहरू पुर्ननिर्माण गर्न सत्तासिन दल एमालेको भातृ संगठन अनेरास्ववियु आफैँ कस्सिएको छ ।

अनेरास्ववियुले धादिङको थाक्रेमा भुकम्पबाट क्षतिग्रस्त बनेको बाराही प्रा.वि. पुनःनिर्माण गरेको छ । अनेरास्ववियुकी सचिव राधिका खतिवडा नेतृत्वको टोलीले अस्थायी टहरा निर्माण गरेको हो । ‘विद्यार्थी विद्रोहका प्रतिबिम्व मात्र होइनन् निर्माण र सिर्जनामा पनि विद्यार्थीहरू उत्तिकै तल्लिन छन् भनेर प्रमाणित गर्न हामीले विद्यालय निर्माण गरेका हौँ’ खतिवडाले नेपालपाटी डटकमसँग भनिन् ‘हाम्रो अभियान जारी छ ।’

भूकम्प पीडितहरूको उद्धार र राहत कार्यलाई प्रभावकारी बनाउन तथा क्षतिग्रस्त संरचना निर्माणका लागि अनेरास्ववियुले १२ वटा टीम बनाई करिव ५० हजार कार्यकर्ता देशभर परिचालन गरेको छ । त्यसमध्ये खतिवडाको टोलीले धादिङ जिल्लाका क्षतिग्रस्त संरचना पुनः निर्माणमा सघाउने उनको भनाई छ ।