ज्यान जोगाउन भागियो-सभामुखको कुर्सीमा बसेकी सभासद भन्छिन् आत्तिँदै बैठक रोकेँ, के गर्ने भन्ने सोच्नै सकिँन

प्रतिक्षा तिवारी, सभासद

सभामुख सुवास नेम्वाङले संसद बैठकको शुरुवात गरेपछि सभामुखको आसनमा बसेर बैठक सञ्चालन गर्ने जिम्मा मेरो आएको थियो । म बैठकको अध्यक्षता गरिरहेकी थिएँ ।

बैठक लगभग समयमै शुरु भएको थियो । नेकपा एमालेका सभासद विष्णु पौडेलले बोल्ने पालो आएको थियो । मैले झुक्किएर बिष्णुमाया पौडेल भनेपछि सभासदहरुबीच हाँसो छाइरहेको थियो । त्यतिकै बीचमा बिष्णु पौडेलले आफ्नो सम्बोधन शुरु गर्नासाथ भूइँचालो आएपछि सभासदहरुको भागदौड मच्चिन थाल्यो ।

सभासद प्रतिक्षा तिवारी छोरासँग

म बसेको सभामुखको कुर्सी डग्मगाउन थाल्यो । के गरुँ, कसो गरुँ भन्ने सोच्नै सकिँन । उता हेर्दै थिएँ, बिष्णु पौडेल रोष्टममा उभिएर अक्क न बक्क अवस्थामा हुनुहुन्थ्यो । संसद सचिवालयका कर्मचारीहरुतिर हेरेँ, धेरैजसो ज्यान जोगाउन भागिसकेका थिए ।

(यो पनि पढ्नुहोस् : भूकम्पपछि संसदमा सभासदको भागाभाग) बाँकी रहेकाले बैठक स्थगितको सूचना दिएर भाग्नु ठीक हुन्छ भन्ने सल्लाह दिए ।

म र बिष्णु पौडेलबाहेक त्यतिबेलासम्म बैठक कक्षमा एकजना सभासद मात्रै थिए । उनलाई पनि मर्यादापालकले समातेर बाहिर निकाल्दै थिए । मैले बैठक बुधबार एक बजेसम्मका लागि स्थगित भएको सूचना दिएपछि मर्यादापालकको सहयोगमा बाहिर निस्किएँ ।

सोच्दै नसोचेको जस्तो अवस्थामा एक्कासी ठूलो भूकम्प आउँदा अब के गर्ने भन्ने सोच्नै सकिँन । अब ठूलो क्षति हुने भयो, सभासदहरुको ज्यान नै जाने भयो भन्ने लाग्यो ।

आजै मैले मेरो सानो छोरालाई पनि सँगै लिएर आएकी थिएँ । उसको अवस्था के भयो भन्ने अर्को चिन्ता थपियो ।

बाहिर निस्कँदा सभासदहरु खुला चौरमा थिए । सर्वसाधारण जनता पनि भित्र आइरहेका थिए । मैले मेरो छोरो भेटाएर उसलाई खाना खुवाएँ ।

अझै पनि राम्रोसँग हात खुट्टा चलेका छैनन् । सभामुखको कुर्सीमा बसेर गरेको भूकम्पको अनुभव साँच्चिकै अत्याशलाग्दो रह्यो ।