जग्गा विवादमा कुटपीट, १ को मृत्यु

३१ वैशाख, चन्द्रपुर । रौतहटको सरमुजवा गाविसमा जग्गाको सीमानाको विषयलाई लिएर भएको झडपमा एक जनाको मृत्यु भएको छ ।

सरमुजवा गाविस ५ का बद्री बैठा, कृतकिसोर बैठा, बृज किसोर बैठा, लक्ष्मण बैठा, दशै बैठाबीच जग्गाको सीमानाको बिषयलाई लिएर विवाद भएको थियो । विवादले उग्ररुप लिएर कुटाकुट हुँदा बद्री बैठाको मृत्यु भएको जिल्ला प्रहरी कार्यालय रौतहटले जनाएको छ ।

कुटपीटबाट बद्रीको मृत्यु भएपछि भारत तर्फ भाग्दै गरेको अवस्थामा प्रहरीले नेपाल-भारत सीमा क्षेत्रबाट कृतकिशोर, बृजकिसोर र दशैलाई पक्राउ गरेको छ ।

जिल्ला प्रहरी कार्यालय रौतहटका एसपी सानुबाबु थपलियाले कुटपिटबाट हत्या भएको जानकारी पाउनासाथ तत्कालै संलग्नहरुलाई पक्राउ गर्न निर्देशन दिएको र तिनै जनलाई सिमावर्ती क्षेत्रबाट पक्राउ गर्न सफल भएको बताए ।

घटनास्थलमा एसपी थपलिया आफै पुगेर आवश्यक अनुसन्धान गरिरहेका छन् । उनले पीडकहरुलाई नियन्त्रणमा राखेर आवश्यक कारवाही सुरु गरिएको समेत जानकारी दिए ।