निर्देशन छाडेर रेखा बनिन् संगीतकार

चलचित्र ‘हिम्मतवाली’मा निर्देशक श्याम भट्टराइलाई निकालेर आफै निर्देशक बनेपछि धेरैलाई लागेको थियो, रेखा थापा अब पक्काकी निर्देशक बनिन् । उनले बनाएको यो चलचित्रले व्यापार पनि राम्रो गर्‍यो । रेखा थापाले अब आफू निर्देशक बन्ने बताएकी थिइन् । उनले चलचित्र ‘रामप्यारी’ आफै निर्देशन गर्ने पनि बताइन् । तर, पछि उनले यो चलचित्रको जिम्मा सविर श्रेष्ठलाई दिइन् ।
उनै रेखा थापा अब चलचित्रको निर्देशकलाई थाती राख्दै संगीतकार बन्न लागेकी छिन् । उनले आफूले निर्माण गर्न लागेको चलचित्र ‘रामप्यारी’को एक गीतमा संगीत गर्न लागेकी हुन् । योसँगै रेखाको परिचय अब कलाकार, निर्माता, गायिका, निर्देशक र संगीतकारको बन्नेछ । रेखाले यो गीतमा आफै शब्द पनि कोरेकी छिन् । चलचित्रमा बसन्त सापकोटाले पनि संगीत भर्नेछन् ।
रेखाले गीतको शब्द फुरेको र ट्यूनिङ पनि दिमागमा आएकाले आफै संगीत भर्न लागेको बताएकी छिन् । यो चलचित्रले महिला ट्याम्पु ड्राइभरको कथालाई उठान गर्नेछ । जे भएपनि रेखा थापाका लागि अहिले ‘आफ्नै हात जगन्ननाथ’ भन्ने उखान लागू भएको छ ।