नेपाल विश्वकप छनौटको पहिलो चरणबाटै बाहिरियो

काठमाडौं, चैत ३ -नेपाल विश्वकप फुटबल र एशिया कप फुटबलको प्रारम्भीक छनौटबाटै बाहिरिएको छ । मंगलबार दशरथ रंगशालामा भएको खेलमा भारतसँग गोलरहित बराबरीमा सकिएपछि नेपाल समग्रमा २–० ले पराजित हुँदै पहिलो चरणबाटै बाहिरिएको हो ।नेपाललाई पछि पार्दै भारत भने दोश्रो चरणमा पुगेको छ ।
भारतमा भएको पहिलो लेगमा २–० ले हारेको नेपाललाई दोश्रो चरणमा प्रवेश गर्नका लागि मंगलबारको खेल ३ गोलको अन्तरले जित्नु पर्ने थियो । तर नेपालले कुनै गोल गर्न सकेन । खेलमा केहि मौका पाएपनि त्यसलाई दुवै टिमले सदुपयोग गर्न सकेनन् ।
एसियाली फुटबल महासंघ एएफसीले सन् २०१८ मा रसियामा हुने विश्वकप र त्यसको एक वर्षपछि हुने एसिया कप फुटबलको एउटै संयुक्त छनौट प्रतियोगिता आयोजना गरेको हो ।