विद्यालयको चुनावमा झडप, दुईको मृत्यु

जनकपुरधाम । विद्यालय व्यवस्थापन समितिको चुनावलाई लिएर भएको विवादमा धनुषामा दुई जनाको मृत्यु भएको छ । सबैला नगरपालिका एकमा रहेको मदन आश्रति निमाविको व्यवस्थापन समिति चयन गर्न आइतबार उम्मेद्वारी दर्ताको समय तोकिएको थियो । उम्मेद्वारीका लागि २५ हजार रुपैयाँको धरौटी रकम तोकिएको छ ।

विद्यालय व्यवस्थापन समिति अध्यक्षमा नेपाली कांग्रेस, एमाओवादीसहितका दलहरु एकातिर छन् भने एमाले विपक्षी बनेको छ ।

उम्मेद्वारी दर्ताको अघिल्लो रात संयुक्त भेला भइरहेको स्थानमा एमाले कार्यकर्ताले आक्रमण गरेको नेकपा (माओवादी)का संयोजक मात्रिका यादवले आरोप लगाए । उनका अनुसार आक्रमणमा परी गम्भीर घाइते भएका ४५ वर्षका रामसेवक राउतको उपचारका लागि काठमाडौं ल्याउँदै गर्दा बाटैमा मृत्यु भएको छ ।

प्रहरीका अनुसार दुईपक्षबीच राति पनि झडप भएको थियो । स्थानीयले गोली चलेको समेत बताएका छन् । घटनामा ४२ वर्षका रामप्रकाश यादवको मृत्यु भएको छ ।

अर्का एक गम्भीर घाइते भएका छन् । उनको शिक्षण अस्पतालमा उपचार भइरहेको छ ।

घटनाबारे अनुसन्धान भइरहेको प्रहरीले जनाएको छ ।